الأيمان يتحول عيان
الشخصيات :-
1- الام (سميره)
2- الابن (ناجى)
3- البنت (هبه)
4- الجد (شاكر)
5- الغفير (فرحات)
6- الدكتور (سامى)
الهدف:-
أثبات أن الايمان والثقه بالله تمنحنا الغير مستطاع
الادوات :-
أ-ديكور منزل بسيط:
2كرسى+ترابيزا+برواز+سجاده+سرير فى الوسط +
ان أمكن تلفاز
ب-موسيقى تصويريه خفيفه مشاركه.
ج- أضائه منزل عاديه.
د- ملابس ومكياج :
1- الجد ــــــــ.. ملابس عمده
2- فرحات ــــ شيخ غفر بمنظر مضحك
3- الام ـــــــــ ملابس منزل عاديه
4-دكتورـــ شنطه الكشف وملابس عاديه
(يمكن الابتكار أكثر من ذلك فهذه بدائيات الديكور والمكياج والإضاءة ... ملحوظه الاطفال ينبهرون من الاسكتشات ذات العناصر المتنوعة المتشاركة كالإضاءة والمؤثرات الصوتية)
المشهد الاول
(يبدأ المشهد والام تنظف المنزل وهى تنادى أولادها )
الام : يالا يا ولاد أصحوا الساعة 12 الضهر .
ناجى : أيوة يا ماما أنا صحيت اهو .
هبه : صباح الخير يا ماما.
الام : صباح الخير يا ولاد . عايزين تفطروا ؟؟
ناجى : أيـــــــون طبعا يا ريت وبسرعه كمان انا جعان جدا.
الام : انا مش عارفه أنت صاحى جعان كدا على طول .
(وفجأه تبطئ وهى تمشى ثم تصرخ )
آآآآآه ...رجلى .. انا مش قادره الحقونى يا ولاد الحقونى .
ناجى : ماما .. مالك مالك سلامتك يا ماما .
هبه : أسندها معايا يا ناجى أسندها .
(يسند ناجى وهبه والدتهم ويوصلوها للسرير )
هبه : طب وبعدين يا ناجى هانعمل ايه ؟
ناجى : انا مش عارف !؟. طب نوديها المستشفى ؟
هبه : هى مش قادرة تمشى يا ناجى .
ناجى : ممممم . مافيش حل غير اننا نكلم جدو .
هبه : جدو .... صح كدا كلمه بسرعه يالا .. بس جدو ها ياخد وقت عقبال ماييجى من الصعيد .
ناجى : مش مشكله على الاقل يقول لنا حتى نعمل ايه .
(ناجى يتحدث الى الجد فى الموبايل )
ناجى : ألو ... أيوه يا جدو ..... انا ناجى .... جدو ألحقنى ماما تعبت فجأه ومش عارفين نعمل أيه ....... مممممم طيب ماشى يا جدو حاضر هاكلمه ..... أنت مش هاتيجى ؟؟؟..... طيب هانستناك .
هبه : أيه قالك أيه يا ناجى ؟؟؟
ناجى : قال لى أكلم الدكتورسامى عقبال ما هو ييجى بالليل .
هبه : طيب يالا كلم الدكتور ..
ناجى : ألو دكتور سامى .... انا ناجى أبن فايز حنا ...أهلا بيك .. دكتور ماما تعبانه أوى ممكن تيجى تشفها .... okأحنا فى انتظارك ..باى.
هبه : سلامتك يا ماما ألف سلامه ماتخافيش خير ان شاء الله .
(جرس الباب يرن )
ناجى : الدكتور وصل هافتحله ..نضفى المكان بسرعه يا هبه.
الدكتور : صباح الخير .. سلامتك يا فندم ألف سلامه ..
(بعد الكشف )
ناجى : خير يا دكتور ؟؟
الدكتور : للأسف يا ولاد ... ماما حصلها جلطه قويه
وهى للاسف مش هاتقدر تمشى تانى إلا.....
ناجى : إلا أيه ؟؟
الدكتور : إلا لوعملنلها عمليه بس العمليه دى خطيره ومكلفه.
هبه : يعنى هاتتكلف كام يا دكتور ؟؟
الدكتور :عملية ومستشفى وعلاج 50 ألف جنيه ..
ناجى : ياااااااه .. ده كتير أوى .. ماشى شكرا يا دكتور.
هبه : والعمل يا ناجى ؟
ناجى : ولا حاجه هانستنا جدو ونشوف هايعمل أيه ؟.
هبه : طيب أدخل نام أنت وانا هاقعد مع ماما .
ناجى : وانا هايجيلى نوم دى مشكله كبيره ا ..أوي
هبه : ماتخافش يا ناجى ... ربنا موجود وأكبر من اى مشكله ... أنت نسيت فى مدارس الاحد ان ا حنا حفظنا الأيه اللى بتقول – وصلاه الايمان تشفى المريض – ماتخافش أحنا لو صلينا ماما هاتخف من غير عمليه .
ناجى : الكلام ده هناك فى الكنيسه ... على العموم هانشوف جدو هو اللى هايقرر .
(تهدأ الانوار وكان الليل حل ويطرق الباب فجأه بشكل مزعج)
هبه : يا ماما ... مين اللى بيخبط كدا انا خايفه اوى يا ناجى .
ناجى : ماتخافيش ... انا هاشوف مين .. يارب أستر .
(يفتح ناجى الباب ويدخل فرحات وبشكل كوميدى يهجم عليهم)
فرحات : (وهو موجه سلاحه فى وجههم ) مكانك منك ليها .... ولا حركه ... أهيييييه أنزل على ركبك يا ولا وانتى يا بّه.
ولا حركه .
ناجى : أنت مين يا عم أنت .
هبه : وعايز مننا ايه ؟
فرحات : أنا .. (فى لكنه سريعه) فرحات سرحان بشندى المدب .. رئيس أركان غفر البلد ... والصباع ( الدراع ) اليمين للعمده شاكر ... والحاصل على جائزه أفضل غريق فى الترعه .بس خلاص.
ناجى : وعايز أيه يا عم الغريق ؟؟
فرحات : انى ...... (بعد تفكير) نسيت .. المهم أثبتوا ولا حركه .. أسمك ايه يا ولا أنت ؟؟
ناجى : أنا .. ناجى .
فرحات : ناجى ... نا...جى .. جى ولا مجاش .هيهيهيهيهيه
هبه : أنت لذيذ أوى يا عم فرحات حقيقي لذيذ .
فرحات : ما انى عارف ده انا ألذ من الفسن أب .
ناجى : قصدك السفن أب ..
فرحات : وانت مالك انت ولا كلمه ولا حركه ..
(يدخل الجد شاكر ويندهش من الوضع )
الجد : واد يا فرحات أنت أيه اللى انت عامله فى الولاد ده .
فرحات : أنت مش قلتلى أسبقنى وطمنهم أنك جيت .
الجد : أنا قلتلك طمنهم مش أقتلهم ..
فرحات : ده للأمن والامان .. وبعدين أنا نسيت أنت قولتلى ايه أهيييييه... هيهيهيهيهيه .
الجد : طب أوعى أوعى .. معلش يا ولاد ماتخافوش ده فرحات تعبنى فى كل حته .. بنتى سلامتك ألف سلامه يا سميره يا بنتى ..
ناجى : حمدلله على السلامه يا جدو .
الجد : الله يسلمك .. أيه الدكتور قالكوا ايه ؟؟
ناجى : قالنا للأسف ماما مش هاتقدر تمشى تانى الا بعد العمليه .
الجد : طب وماله مانعملها العمليه ...
ناجى : بس دى هاتتكلف 50 ألف جنيه .
الجد : ياااااااااه .. مايهمش ربنا يدبر .
فرحات : آبا العمده آبا العمده ... ينفع أدخل أغسل وشى ؟
الجد : أدخل يا فرحات .
(يدخل فرحات ويتكلم من الداخل)
فرحات : يا آبا العمده يا آبا العمده
الجد : نعم يا فرحات ؟
فرحات : فى حفره وفيها ميه أغسل وشى فيها .؟
الجد : حفره وفيها ميه ؟!! لالالالا يا فرحات أوعى دى ما بنغسلش فيها وشنا .
فرحات : ؤمال بنغسل فيها ايه ؟؟
الجد : مممم بعدين هابقى أقولك .. أخلص وتعال .
فرحات : يا آبا العمده يا آبا العمده .
الجد : أيـــــــوه يا فرحات ؟؟
فرحات : هما حاطين مركب هنا ليه ؟؟
الجد : مركب !! اااااه لا ده البانيو يا فرحات سيبه فى حاله وتعال..
فرحات : آبا العمده آبا العمده
الجد : يا رب صبرنى ... نعم يا فرحات ؟؟
فرحات : هو الحمام فين ؟؟
الجد : فرحات أطلع بره وتعال هنا حالا ً.
فرحات : (يخرج وهو ينظف فمه من شئ تناوله ) أيوه يا آبا العمده انا جيت أهه ...
الجد : تعال أقعد وماتتحركش تانى من هنا ..
فرحات : حـاضر (ويجلس بجوار الام على السرير)
أتداخرى كدا شويه يا تيزا ( ياستي)أهييييه ..
الجد : أنت بتعمل ايه يا ولا ؟؟
فرحات : بقعد ... هى هاتنام على كل ده لوحدها يعنى ..بونسها ..أهيييييه .
الجد : قوم ياولا من على السرير ... البنت عندها جالطه هاتموتها وتنيمنى مكانها انا عارفك .. قوووم.
فرحات : ألف سلامه عليك يا آبا العمده من الخلطه ... مش الخلطه دى بتاعه تكاك كنكاتى ..
الجد: أسمه دجاج كنتاكى .. لا مش هى دى .وأقعد ساكت .
هبه : أتفضل يا جدو الشاى ... أتفضل يا فرحات ..
الجد : تسلم أيدك يا بنتى .
فرحات : لا شكرا مش عايز شبعت .
الجد : شبعت ؟! أنت مش فى القطارقرفتنى عايز تشرب حاجه عايزتشرب حاجه ماتشرب شاى اهو .؟
فرحات : لالا . ما وانا جوا لقيت عصير بمبى وبيتفتح من فوق ومكتوب عليه 2×1 قلت أكيد مانجوا وبرتقال فى بعض كوتكيل يعنى ..رحت شربته بس طعمه مر أوى يا آبا العمده .
ناجى : يالهوى شربت الشامبو .
فرحات : هو العصير عنديكوا بتسموه شامبوا ... عليكوا حاجات أنتوا يا أهل البندر .أخ يا نى منكوا اااخ ..
الجد : فرحات قوم أحرس الباب من بره قوم .
فرحات : أوامرك يا آبا العمده .
هبه : والحل يا جدو ؟؟؟
الجد : بصوا يا ولاد انا هابيع محصول السنه دى كمان يومين .وكمان لو مقضاش هابيع الجاموسه اللى حيلتى ونجيب حق العمليه .
ناجى : لا يا جدو بس دول كتير أوى .
الجد : مافيش حاجه تغلا على بنتى حببتى.
فرحات : يا آبا العمده يا آبا العمده تليفون عشانك .
الجد: رد انت يا فرحات انا ماليش مزاج أرد على حد ..
فرحات : حـــــــــاضر
فرحات : آبا العمده آبا العمده .. ألحق يا آبا العمده
الجد : خير يا فرحات ؟
فرحات : الجاموسه يا آبا العمده ...
الجد : مالها يا واد أنطق ؟؟
فرحات : وهى واقفه فى الدوار فجأه وقعت من طولها .وماتت.. هيهيهيهيهيهيه...
الجد : يالهوى ماتت .. وانت فرحان يا واد ..
فرحات : أيييييييوه فرحان فيها عشان ماكنتش بترضى تلعب معايا ...
الجد: يااربى.... الجاموسه راحت يا ولاد ..أطلع بره يا فرحات برااا
ناجى : معلش يا جدو ربنا يعوضك ...معلش
فرحات : يا آبا العمده يا آبا العمده تليفون عشانك
ناجى : رد انت يا فرحات جدو تعبان .
فرحات : يا آبا العمده يا آبا العمده.. الحق يا آبا العمده .
الجد : أيه تانى يا وش السعد (بغيظ)
فرحات : الجاموسه لما داخت ووقعت من طولها وماتت وهى بتقع وقعت بابور الجاز بتاع الغفروالنار مسكت فى القش ودخلت على المخزن وولعت فى المحصول كله .هيهيهيهيهيه.
الجد : ااااااااه ... الحقونى سندونى قعدونى ..
ناجى : تعال يا جدو أقعد سلامتك ..
هبه : معلش يا جدو فداك 100 محصول وجاموسه .
الجد: آآآآآآه انا كدا ضعت انتهيت ..
هبه : ناجى خد جدوا ودخلوا جوه يستريح ..
فرحات : آبا العمده آبا العمده هو انت مضايق ؟؟
الجد : حد يمشيه من قدامى ..
ناجى : روح مكانك يا فرحات ... تعال معايا يا جدو تعال .
هبه : (وهى بتكلم نفسها )
وبعدين يا ربى ... المحصول والجاموسه اللى كان جدو هايبعهم عشان خاطر العمليه راحوا... وماما تعبانه أوى وبعدين أيه الحل ؟؟؟ مش أنت يارب واعد انك دايما جمبنا ولو صلينا تسمعنا ؟؟ طيب أنا هاصلى دلوقتى وأرجوك أسمع صلاتى (تتجه لوالدتها لتصلى معها)
ماما ينفع أصلى معاكى عشان رجلك .
الام : ماشى يا حبيبتى أميييين
هبه : يارب يسوع باشكرك على كل شئ .. وبطلب منك أنك تلمسها وتشفيها بقوتك انت يارب يسوع .بالايمان بصلى أنت تقدر وأنا مصدقا أنك تقدر تشفيها حالا . أميييييييين .
الام : أمين يا هبه .. ربنا يباركك يا حبيبتى . انا حسيت وانتى بتصلى بأن رجلى أتحركت .
هبه : بجد يا ماما ... طب ماتحاولى تقفى عليها كدا ؟
الام : تفتكرى هاقدر ؟... ده الدكتور قال لازم عمليه .؟
هبه : ويسوع قال "صلاه الايمان تشفى المريض " ..يالا قومى يا ماما
الام : طب ساعدينى أنزل كدا من على السرير . انا عندى أيمان فى يسوع .
هبه : ...ماما ... أنتى وقفتى فعلا على رجليكى ..ماما أنتى بتمشى ..أشكرك يا يسوع ...أشكرك يا يسوع ...
الام : هبه انا بمشى وأحسن من الاول كمان ..أشكرك يا يسوع أشكرك .
هبه : يا جدووو يا ناااااااجى تعالوا بسرعه ماما بتمشى .
الجد وناجى :فى اندهاش) بتمشى ؟؟!!
الجد: أشكرك يارب حصل أزاى ده ؟؟
هبه : صلينا انا وماما بالايمان ويسوع شفاها .
ناجى : أشكرك يا يسوع ... يا هبه أنا صدقت فعلا دلوقتى أن صلاه الايمان تشفى المريض فعلا فى اى مكان وفى اى وقت مش فى الكنيسه بس أشكرك يا يسوع
فرحات : (يدخل مسرعا ً) ايييييييييييه ؟؟ فى أييييييييه ؟؟
هبه : ماما بتمشى ماما بتمشى .
فرحات : بتمشى ؟؟ هى كانت بتحبي ولاأييييييييه ؟
(بتحبى:تزحف كالاطفال @للتوضيح@)
هبه : بتحبى أيه بس .. هى كانت مشلوله ..
فرحات : بجد مشلوله ..لا سلامتها ألف سلامه ماتودوها للدكتور ..؟؟
الجد: فرحات. انا غلطان انى جبتك معايا ..أشكرك يارب أشكرك يا رب .(ويقف حزين وحده بجانب المسرح)
ناجى : هبه جدو شكله زعلان على الخساره بتاعته .
هبه : ممم أكيد طب ماتيجى نصلى معاه .
ناجى : يالا بينا .
هبه : جدو أحنا عارفين أن اللى حصلك مش سهل ..بس لو صلينا يسوع هايحل المشكله ..
الجد : أميييين يا ولاد .. وأنا موافق .
هبه : (وهى تصلى ) يارب بنصلى من اجل جدو أقف معاه فى الازمه دى وانت يارب أكبر من اى مشكله أميييين .
الجد : أمين ياولاد انا بصدق فى الرب يسوع ..
فرحات : آبا العمده يا آبا العمده .تليفون عشانك أرد ؟؟
الجد : لالالا هارد أنا كفايا انت كدا ..هات .
الجد : ألو .. أيوه انا شاكر مسعود خير ..... أيوه أفتكرتك ...أييه بجد (وهو يبتسم) طب شكرا اوى انا متشكر اوى ....اه بكره الصبح هاستناك ....مع السلامه سلام .
هبه : خير يا جدو ؟
الجد :أشكرك يا رب .. يا ولاد ده واحد كان أخد منى فلوس سلف كتير أوى من فتره كبيره ... وانا أفتكرته مش هايرجعهم تانى ...لكن هو كلمنى دلوقتى وقالى انه هايرجعهم بكره الصبح ..أشكرك يا رب..
ناجى : أشكرك يا رب..
هبه : شفت يا جدو صلاه الايمان بتعمل أيه ؟؟
الجد : فعلا يا ولاد ..صلاه الايمان كنز كبير ..دى بتشفى المريض وتحل المشاكل ... وفى كل مكان وكل زمان
ربنا بيسمع لنا لما بنصلى ويحقق لينا كل اللى عايزينه ..
(ثم يبدأ بالنظر الى الجمهور ويوجه الرساله لهم )
وانتوا كمان ياولاد لازم تصلوا صلاه إيمان ..كل حد تعبان تعرفوه وفى مشكله صلوا لاجله صلاه ايمان..
(وبشكل تصاعدى ختامى ) لان صلاه الايمان تشفى المريض صلاه الايمان تشفى المريض صلاه الايمان تشفى المريض .
(ويحضن أحفاده وتغلق الستار على هذا المشهد النهائى)
النــــــــــهايه
.........
(رجاء الصلاه من أجل العمل بالهدف .. والتدريب عليه أقل عدد بروفات 3 بروفات كامله)
